Gjykata e Apelit të Posaçëm ka rrëzuar kërkesën e ish-kryeministrit Sali Berishës për të marrë pjesë në seancat plenare të Kuvendit, i cili ndodhet në arrest shtëpie. Avokati i ish-kryeministrit, Genc Gjokutaj tha se kërkesa u rrëzuar nga gjykata, por parësore mbetet lirimi i tij nga akuzat, të cilat i quan politike dhe pa fakte.
“Berisha nuk është një punëmarrës që trajtohet mbi bazën e ligjit të të burgosurve. Ai trajtohet nga Kushtetuta janë rastet kur mandati mbaron ose ndërpritet dhe në asnjë pikë të vendimeve gjyqësore nuk përmendet kjo. Kërkesa për dhënien e lejes është një kërkesë e pjesshme, pasi ne e kemi bërë në kuadër të kërkimeve të plota për të mos lënë asnjë shteg procedural e kushtetues pa konsumuar në dobi të çështjes. Objektivi ynë është lirimi i Berishës pasi nuk ka vepër penale, nuk ka akuzë dhe nuk ka prova. Nëse deri më sot nuk kemi pasur asnjë lloj përgjigje për detyrimin ligjor që ata kanë për të raportuar 1 herë në dy muaj në gjykatë, herën e fundit sollën disa dokumente që nuk kanë lidhje me çështjen. Dua t’i denoncoj që ka një set provash që bëjmë vajtje ardhje, i sjellim dhe nuk i pranon SPAK. Nuk i lexojnë as për kuriozitet”, tha Gjokutaj.
I pyetur nëse mandati i Sali Berishës do të digjet, avokati tha se ligji kërkon një arsye se një deputet nuk vjen në kuvend dhe Berisha e ka një të tillë.
“Zoti Berisha nuk mungon në Kuvend pa arsye, pasi ligji kërkon arsyen e mungesës. Nëse do të quhet arsye lajthitja e kësaj gjykate e SPAK me Berishën do të shohim se çfarë do të ndodh”, tha avokati.
Berisha ndodhet në arrest shtëpie që prej datës 30 dhjetor 2023 lidhur me dosjen “Partizani”, ku akuzohet për korrupsion pasiv.
Prej 30 dhjetorit 2023, ish kryeministri Sali Berisha ndodhet në arrest shtëpie lidhur me akuzën e korrupsionit pasiv për çështje Partizani. Sipas ligjit mos marrja pjesë për 6 muaj në punimet e Kuvendit, deputeti humbet mandatin e tij. Prej rreth 3 muajsh në “arrest shtëpie” Berisha rrezikon t’i ndiqet mandati. Më parë këtë kërkesë Berisha e kishte bërë në GJKKO, por ishte rrëzuar nga shkalla e parë e gjykimit.
