Krahas të moshuarve e të sëmurëve me sëmundje kronike, imunizimi kundër gripit sezonal rekomandohet edhe për profesionistë shëndetësorë. Por, sipas të dhënave të IKSHPK-së del se një numër i madh i tyre refuzojnë që ta marrin vaksinën. Për këtë shkak Instituti ka zhvilluar takime me disa profile mjekësh e infermierësh për t’ua rikujtuar rëndësinë e këtij procesi. E në Odën e Mjekëve fajësojnë mungesën e planifikimit dhe të bashkëpunimit ndërinstitucional për këtë situatë
Prej afro 10 mijë e 400 punëtorëve shëndetësorë në Qendrën Klinike Universitare dhe në spitale rajonale, vetëm rreth 1 mijë e 200 sish janë imunizuar kundër gripit sezonal.
Krahas të moshuarve e personave me sëmundje kronike, marrja e vaksinës kundër gripit u rekomandohet edhe profesionistëve shëndetësorë. Por, sipas Institutit Kombëtar të Shëndetit Publik, ata në vazhdimësi i janë përgjigjur në numër të paktë thirrjes.
Për këtë shkak, pos fushatave vetëdijesuese me qytetarë për përfitimet nga vaksinat, IKSHPK-ja zhvillon takime edhe me profile të ndryshme mjekësh e infermierësh.
“Ndonjëherë duket paksa paradoksale që mjekët t’ju shpjegojnë mjekëve pse duhet vaksinuar, mirëpo në rrethanat kur kemi, për shembull, prani jashtëzakonisht të infeksioneve të ndryshme respiratore, raste të gripit, është gjithmonë e nevojshme apo e dobishme që të rikujtohet që ekziston vaksina e cila nuk ka limite të përdorimit dhe është mjaft e dobishme nëse përdoret edhe prej profesionistëve shëndetësorë”, ka thënë Faik Hoti, mjek në IKSHPK.
Ai e ka vlerësuar të nevojshëm informimin mbi vaksinat, veçmas në periudhat sikurse sivjet, kur gripi e kaloi pragun epidemik.
“Natyrisht, profesionistët shëndetësorë e dinë rëndësinë e vaksinimit por meqë punojnë gjithmonë, janë në kontakt me pacientë, me qytetarë të ndryshëm, ekziston nganjëherë ai perceptimi që ata e konsiderojnë veten që janë të mbrojtur ose imunë ndaj agjentëve të ndryshëm apo viruseve me të cilët mund të jenë në kontakt potencialisht”, ka theksuar Hoti.
E, Pleurat Sejdiu, kryetar i Odës së Mjekëve, ka thënë se numri i ulët i mjekëve që vaksinohen nuk përbën befasi, dhe thotë se kjo është pasojë e mungesës së planifikimit dhe bashkëpunimit ndërinstitucional.
“Fundja-fundit, është vendim individual i gjithsecilit ta bëjë një gjë të tillë. Edhe nuk kam parë, së paku Instituti ndoshta përmes sistemit menaxherial të QKUK-së edhe klinikave, të bëjë një kampanjë apo një vetëdijesim, përkundër që punëtorët shëndetësorë do të duhej të ishin të vetëdijshëm për këtë çështje dhe të rritet ky numër. Por ja se ky është”, ka thënë Sejdiu.
Ai përmend edhe periudhën e pandemisë COVID-19, kur, sipas tij, gjithashtu ka qenë i ulët numri i mjekëve që janë imunizuar ndaj koronavirusit.
Për trajnimet me mjekë gjinekologë e pediatër mbi imunizimin, si dhe për numrin e atyre që morën vaksinën kundër virusit të gripit, KOHA u adresoi pyetje klinikave përkatëse, porse në përgjigjet e përcjella thanë që sqarimet të kërkohen nga IKSHPK-ja. Të dhëna nuk kanë ofruar as në Odën e Infermierëve e as në SHSKUK.
