Beteja mes Telekomit dhe kompanisë së oligarkut Blerim Devolli Dardafon.net (Z-Mobile) po vazhdon, pas bllokimit të xhrollogarive bankare nga ana e Z-Mobile.
Ministrja e Drejtësisë Albulena Haxhiu ka suspenduar përmbaruesin privat Irfan Kërçagu pas kërkesës së Telekomit të Kosovës. Në vendimin e nënshkruar nga znj.Haxhiu thuhet se: Irfan Kerçagu, përmbarues privat në Territorin e Gjykates Themelore në Prishtinë suspendohet nga ushtrimi i funksionit të përmbaruesit privat deri në një vendim te Komisionit Disiplinor.
Tutje në arsyetimin e vendimit të Ministrisë së Drejtësisë thuhet se: “Me datë 11.03.2024, Departamenti për Profesione të Lira në Ministrinë e Drejtësisë ka pranuar nga Telekomi i Kosověs Sh.A, në cilesinë e palës debitore, propozimin për inicimin e Procedurës Disiplinore ndaj përmbaruesit privat Irfan Kerçagu. Me datë 12.03.2024, propozimi për inicimin e procedurës disiplinore ndaj përmbaruesit privat Irfan Kërçagu është proceduar në Komisionin Disiplinor në pajtim më legjislacionin perkatës në fuqi. Komisioni Disiplinor ka iniciuar procedurën disiplinore ndaj përmbaruesit privat z. Kerçagu. Andaj, me qëllim që procedura disiplinore ndaj përmbaruesit privat z.Irfan Kërçagu të zhvillohet e pa penguar u vendos si në dispozitiv të këtj vendimi”
Me 29 shkurt të këtij viti Telekomit të Kosovës i janë bllokuar llogaritë bankare , pas vendimit të shkallës së parë të Gjykatës Komerciale e cila ja njohu borxhin prej 5.7 milionësh kompanisë Z-Mobile edhe pse këtë borxh Telekomi thotë të ja ketë kthyer madje edhe tejkaluar nga shuma prej mbi 30 milionë eurosh nga vendimi i Gjkykatës së Arbitrazhit.
Beteja mes Telekomit dhe Z-Mobile është duke vazhduar tashmë në Gjykatën Komerciale ku për tre herë me radhë shkalla e dytë e kësaj gjykate e ka kthyer rastin në rigjykim. Mirëpo shkalla e parë gjithashtu për tre herë më radhë është duke marrë vendim në favor të Z-Mobile duke mos marrë parasyshë aktvendimin dhe sugjerimet e shkallës së dytë. Kjo hapsirë mes vendimeve të institucioneve gjyqsore është duke u shfrytëzuar nga kompania Z-Mobile ku përmes përmbaruesit privat i ka bllokuar llogaritë bankare të Telekomit duke i mundësuar zhvatjen e 5.7 milionë eurove.
