Deputetët grupit parlamentar të Partisë Demokratike të Kosovës po kërkojnë themelimin e një komisioni hetimor parlamentar lidhur me nivelin e menaxhimit të marrëdhënies së punës të anëtarëve tä Shërbimit të Jashtëm dhe zyrtarëve të Ministrisë së Punëve të Jashtme dhe Diasporës.
Deputetja Ariana Shoshi Musliu më 27 nëntor të vitit të kaluar i ka dorëzuar një kërkesë Kryesisë së Kuvendit të Republikës së Kosovës dhe kryetarit Glauk Konjufca.
Në këtë kërkesë të nënshkruar nga 8 deputetë të PDK-së si arsyetim për themelimin e komisionit hetimor sipas deputetes Shoshi përmenden një varg shkeljesh që ka bërë Ministria e Punëve të Jashtme dhe Diasporës duke përfshirë procedurat e rekrutimit, emërimet e stafit, transferimet, gradimet, degradimet, angazhimet e përkohshme për punë dhe detyra specifike, etj, përgjatë mandatit të deritanishëm të kësaj qeverie, respektivisht nga dita e themelimit të saj 22 mars 2021 e deri në ditën_ e themelimit të këtij komisioni.
Ajo që bie në sy është se në këtë kërkesë mungon nënshkrimi i deputetit të PDK-së Enver Hoxhaj i cili ka qenë për dy herë me radhë ministër i jashtëm, pra në qeverinë Thaçi 1 dhe qeverinë Mustafa.
Pikërisht gjatë kohës sa ka qenë ministër deputeti Enver Hoxhaj, Ministria e Jashtme ishte shndërruar në një fabrikë punësimesh të militantëve e familjarëve të PDK-së dhe shumë skandale të tjera për të cilën patën raportuar mediat në atë kohë.
Sipas burimeve të KosovaNews kjo çështje do të diskutohet sot në kuvend ndërsa pozita do të pajtohet që të themelohet Komisioni Hetimor Parlamentar me kushtin që do ta përfshijë edhe periudhën e hetimit të para vitit 2021 pra që nga themelimi i kësaj ministrie.
