Këshilli Prokurorial i Kosovës ka reaguar pas kërcënimeve që ka marrë prokurorja e Prokurorisë Themelore në Pejë, Valbona Disha-Haxhosaj përmes rrjeteve sociale të delën me anë të publikimit të afishes me përmbajtje mortore.
KPK-ja e ka cilësuar të papranueshëm aktin e tillë, për çka i ka ofruar mbështetje Disha-Haxhosajt për ushtrimin e detyrës së saj.
“Këshilli Prokurorial i Kosovës dënon ashpër kërcënimin e bërë gjatë ditës së djeshme ndaj prokurores së Departamentit për Krime të Rënda në Prokurorinë Themelore në Pejë, znj. Valbona Disha-Haxhosaj, me anë të publikimit përmes rrjeteve sociale të një afisheje me përmbajtje mortore. Ky akt i shëmtuar, për Këshillin Prokurorial të Kosovës dhe tërësisht për sistemin prokurorial, është një akt i papranueshëm dhe i patolerueshëm, andaj KPK-ja bënë me dije se qëndron fuqishëm në përkrahje të prokurores Valbona Disha-Haxhosaj dhe ofron mbështetje të plotë për punën e saj gjatë ushtrimit të funksionit në ndjekjen e kryeseve të veprave penale”, thuhet në reagimin e KPK-së.
Më tej bëhet e ditur se po ndërmerren masa konkrete për identifikimin dhe arrestimin e të dyshuarve që janë marrë me publikimin e kësaj përmbajtjeje.
“KPK-ja njofton se janë duke u ndërmarrë masa konkrete për identifikimin dhe arrestimin e personit/ave, të cilët kanë vendosur këtë lajmërim të paskrupullt dhe të njëjtit do të dalin para organeve të drejtësisë dhe se institucionet e Prokurorit të Shtetit janë duke u trajtuar seriozisht këtë veprim penal dhe në nivelin e duhur të hetimit dhe të ndjekjes gjer në ndriçimin e plotë të tij, i cili ka për qëllim pengimin në ushtrimin e funksionit dhe detyrave të saja kushtetuese dhe ligjore. Në këtë drejtim, KPK-ja, siguron opinionin publik se kërcënimet dhe shantazhet e tilla dhe veprime të tjera, çfarëdo qofshin ato, që bëhen ndaj prokurorëve të shtetit nuk do t’i zmbrapsin synimet dhe përpjekjet e vazhdueshme për fuqizimin e shtetit ligjor në të cilin respektohen vetëm parimet e drejtësisë”, thuhet në njoftim.
