Policia e Kosovës ka apeluar qytetarët që të respektojnë rregullat e trafikut e në këtë mënyrë të shmangin aksidentet me fatalitet.
Në një komunikatë të policisë bëhet e ditur se gjatë 24 orëve të kaluara janë evidentuar gjithsej 34 aksidente në trafikun rrugor.
“Policia e Kosovës me zyrtarët e saj janë duke kryer aktivitete në teren me qëllim që të parandalohen aksidentet rrugore, por edhe janë duke ndërmarr masa ndëshkuese ndaj atyre personave që nuk respektojnë rregullat dhe shenjat në trafik”, thuhet në komunikatë.
Gjatë 24 orëve në nivel vendi, policia ka realizuar 804 pika kontrolli të automjeteve, përderisa 34 shoferëve u është konfiskuar patentë shoferi per shkelje të rregullave në trafik.
“Gjatë ditës së sotme në Prishtinë një person ka humbur jetën si pasojë e aksidentit, andaj apelojmë tek të gjithë shoferët, por edhe pjesëmarrësit tjerë në trafik që të jenë të kujdesshëm dhe gjatë pjesëmarrjes në rrugë të respektojnë dispozitat ligjore që burojnë nga ligji mbi trafikun rrugor, në mënyrë që secili të kontribuon në zvogëlimin e statistikave të aksidenteve rrugore e në veçanti parandalimin e aksidenteve të tilla me pasoja fatale”, thuhet në komunikatën e Policisë së Kosovës.
