Gjykata Themelore në Prishtinë ua ka vazhduar masën e paraburgimit tre serbëve të dyshuar për sulmin terrorist në Banjskë, ku u vra rreshteri policor, Afrim Bunjaku.
Lajmin e ka konfirmuar, zëdhënësja e Gjykatës Themelore në Prishtinë, Mirlinda Gashi.
“Referuar kërkesës tuaj për informata, ju njoftojmë se pas kërkesës së Prokurorisë Speciale të Republikës së Kosovës për vazhdimin e masës së paraburgimit në çështjen penale kundër të pandehurve V.T, B.S dhe D.M, Gjykata Themelore në Prishtinë – Departamenti Special ka aprovuar kërkesën e Prokurorisë Speciale të Republikës së Kosovës, ashtu që të pandehurve V.T, B.S dhe D.M iu është vazhduar masa e paraburgimit në kohëzgjatje prej 2 (dy) muaj, për secilin”, ka thënë Gashi.
Ndryshe, në Banjskë më 24 shtator, një grup i armatosur serbësh sulmoi Policinë e Kosovës, duke vrarë rreshterin policor, Afrim Bunjaku.
Në përleshjet që pasuan u vranë edhe tre sulmues.
Përgjegjësinë për sulmin e mori Millan Radoiçiq, ish-nënkryetari i Listës Serbe.
Kosova e fajësoi Serbinë për sulmin, por e njëjta mohoi çdo përfshirje.
