Dëshmitari i 45-të i Zyrës së Prokurorit të Specializuar (ZSP) me kodin W04576, Hajrush Kurtaj, po vazhdon dëshminë e tij edhe të enjten në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit. Kurtaj ka thënë se nuk e di si është bërë Shukri Buja komandant i Zonës Operative në Nerodime.
Dëshmitarin po vazhdon ta marrë në pyetje avokati i Thaçit, Luka Mishetiq, i cili në fillim të pyetjeve të tij u fokusua te kyçja e dëshmitarit në UÇK, emërimet e komandantëve të Brigadës 162 në Kaçanik, për strukturën e UÇK-së në Zonën Operative të Nerodimes dhe komandantin e kësaj zone, Shkuri Buja.
Dëshmitarit ka theksuar se në UÇK është kyçur vullnetarisht dhe se për këtë, ai ka diskutuar me vëllain e tij, Xheladin Kurtaj, që sipas tij tani është Hero i Kombit dhe me komandantin e atëhershëm të Brigadës 162, Agim Bajramin.
Sipas dëshmitarit, ai nuk ka pasur njohuri deri pas lufte për strukturën e UÇK-së në Nerodime dhe as si ishte emëruar komandant i saj Shukri Buja.
Po ashtu, Kurtaj tha se nuk e di si dhe kush e kishte emëruar Agim Bajramin komandant të Brigadës 126, dhe as Qamil Ilazin që e zëvendësoi Agim Bajramin pas rënies së tij në fushëbetejë.
Ashtu si dje, edhe sot seancën përmes video-lidhjes janë duke e përcjellë gjykatësi Christoph Barthe dhe Jakup Krasniqi.
Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.
Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.
Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.
Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.
Kurtaj: LDK-në nuk e kemi konsideruar kundërshtare të UÇK-së
Dëshmitari Hajrush Kurtaj të enjten tha se Lidhjen Demokratike të Kosovës (LDK) nuk e ka konsideruar kundërshtare të Ushtrisë Çlirimtare të Kosovës (UÇK) dhe se nuk ka dijeni nëse dikush tjetër e konsideroi të tillë.
Këtë deklarim, Kurtaj e bëri duke u përgjigjur në pyetjet e mbrojtësit të Hashim Thaçit, avokatit Luka Mishetiq, raporton Betimi për Drejtësi.
Avokati Mishetiq e pyeti dëshmitarin rreth ndalimit eventual të ndonjë personi që pretendohej të ishte kundërshtar i UÇK-së, në Zonën e Nerodimes ku bën pjesë edhe Brigada 162, pjesë e së cilës ishte dëshmitari.
Lidhur me ndalimin eventual të ndonjë kolaboracionisti nga UÇK-ja në Zonën Operative të Nerodimes, biseda në mes të avokatit Mishetiq dhe dëshmitarit Kurtaj u zhvillua kështu:
Avokati: Kishit ndonjë udhëzim të UÇK-së se si të trajtohen kolaboracionistët?
Dëshmitari: Jo.
Avokati: Shukri Buja a ka dhënë ndonjë udhëzim se si të trajtohen kolaboracionistët?
Dëshmitari: Nuk kam pasur komunikim me Shukri Bujën, nëse e ka pasë, e ka pasur Komandanti, jo unë.
Avokati: Agim Bajrami dhe Qamil Ilazi ju ka dhënë ndonjë udhëzim së si të trajtohen kolaboracionistët?
Dëshmitari: Asnjëherë dhe nuk jemi marrë me këtë punë.
Më pas, mbrojtësi i Thaçit ka përfunduar pyetjet për ketë dëshmitar.
