Qeveria shqiptare synon të nxisë edhe më tej zhvillimin e agroturizimit, si një sipërmarrje e rëndësishme për zhvillimin e bujqësisë dhe turizmit. Me strategjinë e hartuar janë parashikuar një sërë lehtësimesh të mëtejshme për investitorët të cilët kanë dëshirë të angazhohen në këtë sektor.
Zëvendëskryeministrja Belinda Balluku, gjatë një takimi në Klos me sipërmarrës, tha se qeveria shqiptare kërkon që të kthejë në njësi ekonomike çdo fermë edhe çdo bujtinë, pasi secila prej tyre kontribuon në zhvillimin ekonomik të vendit, por edhe të zonës ku ajo është ngritur. “E gjitha kjo e thënë thjesht me fjalë kërkon një punë kolosale nga të gjitha ministritë sektoriale, nga pushteti vendor këtu dhe sigurisht nga secili prej jush të cilin e kanë traditë blegtorinë, bujqësinë”, tha Balluku.
Zonja Balluku tha se synohet që deri në vitin 2030 numri i bujtinave në Shqipëri të jetë 1 mijë. “Nga 240 bujtina, pika agroturizmi, mikpritje që ka sot në Shqipëri ne synojmë që në vitin 2030 të kemi 1000 njësi të tilla” tha ajo
Ministrja e Turizmit dhe Mjedisit Mirela Kumbaro theksoi se është e rëndësishme që kjo strategji të kthehet në një instrument dhe në një dokument që të ndihmojë dhe lehtësojë të gjithë sipërmarrësit. “Dua të ndaj një lajm të mirë me ju, që bashkë me Ministren e Bujqësisë po bëjmë një lehtësim tjetër të gjithë procedurës së certifikimit si agroturizme me qëllim që t’jua lehtësojmë akoma më shumë punën”, nënvizoi Kumbaro.
Ministrja e Bujqësisë dhe Zhvillimit Rural, Anila Denaj, u shpreh se “ Agroturizmi ndërlidh bujqësinë me turizmin për të krijuar një ekonomi e cila e bën zhvillimin e Shqipërisë në 2/3 e saj, por duhet shpirti i sipërmarrjes, dëshira për të shkuar dhe për të zhvilluar këto agroturizme duke filluar si bujtina në radhë të parë pastaj për t’i certifikuar”. Sipas ministres Denaj, certifikimi është një proces i sigurt drejt kësaj ekonomie, drejt këtij punësimi/rtsh
