Zëvendëskryeministri i Kosovës, Besnik Beslimi, ka thënë se projektligji i ri për Komisionin e Pavarur të Mediave (KPM) do të rrisë transparencën e pronësisë së mediave.
Në Komisionin për Administratë Publike, Pushtet Lokal, Media dhe Zhvillim Rajonal të mërkurën u shqyrtua në parim projektligjin për KPM-në. Tani pritet të përcillet në Kuvend, mes shumë kritikave.
Bislimi ka thënë se ky projektligj është në përputhje me direktivat evropiane.
Tea Blakaj, këshilltare ligjore në Qeveri, ka thënë se projektligji ka kaluar në të gjitha fazat e konsultimit publik.
“Kemi transpozuar të gjithë direktivën evropiane”, ka thënë Blakaj.
Por deputeti i Partisë Demokratike të Kosovës, Isak Shabani, ka rekomanduar që ky projektligj të dërgohet për vlerësim në Komisionin e Venecias.
“Kam disa vërejtje për të cilat nuk do të flas në grupe punuese. Mediat nuk janë të lira me këtë projektligj. Do të ketë mundësi që t’i cungohen disa liri dhe kësaj i vjen era diktaturë”, ka thënë ai.
Por në kundërpërgjigje, Bislimi ka ironizuar duke thënë se ose “nuk qëndron ajo që nuk kemi transpozuar direktivën evropiane ose direktivat evropiane janë kundër lirisë së mediave”.
“Askush nuk e cungon të drejtën për të dhënë komente, por askush nuk jep siguri që komentet të jenë të sakta… një ekonomi që synon t’i përafrohet Komisionit Evropian synon formalitet e jo informalitet”, ka deklaruar zëvendëskryeministri, duke iu referuar obligimit për regjistrim në KPM të mediave online që publikojnë video siç parashihet në projektligj.
Për këtë projektligj, javën e kaluar, KPM-ja dhe Asociacioni i Gazetarëve të Kosovës (AGK) mbajtën konferencë të jashtëzakonshme, duke akuzuar Qeverinë se po tenton t’i fusë nën kontroll mediat.
