Kryeministri i Kosovës, Albin Kurti së bashku me ministren e Industrisë, Ndërmarrësisë dhe Tregtisë, Rozeta Hajdari sot morën pjesë në hapjen e Panairit Ndërkombëtar SWISS BAU 2024, në Basel të Zvicrrës, me c’rast vizituan kompanitë kosovare të cilat po ekspozojnë prodhimet e tyre të drurit dhe të tjera të ndërtimtarisë.
Ministrja Hajdari njoftoi se përgjatë kësaj vizite, theksuan përkushtimin e Qeverisë së Kosovës për mbështetjen e sektorit privat në veçanti për prodhuesit me potencial eksporti.
Ajo së bashku me kryeministrin u kanë bërë thirrje bashkatdhetarëve që investimet e tyre potenciale t’i orientojnë në Kosovë, duke i siguruar ata për mundësitë dhe përparësitë që ofrohen përmes reformave legjislative të Qeverisë, të cilat me trajtim të barabartë, mbrojnë dhe sigurojnë investimet e ndërmarrësve vendor, të diasporës dhe ato të huaja.
“Industria e drurit është njëri ndër sektorët strategjik për zhvillimin ekonomik të Republikës së Kosovës, sepse ka potencial për të rritur përfitimet e brendshme nga përdorimi i resurseve vendore dhe është ndër të vetmit sektorë industrial që kanë kontribut pozitiv në rritjen e inovacionit dhe uljen e deficitit tregtar.
Panairi SWiss Bau do të mbahet deri me 19 Janar 2023 në Messeplatz, Salla 1.1, Shtandi nr. A60, B60 dhe A90, Basel, Zvicër, ku 12 kompani vendore të mbështetura nga Agjencia për Investime dhe Përkrahjen e Ndërmarrjeve në Kosovë (KIESA) po ekspozojnë produktet e tyre me vlerë të lartë nga industria e drurit dhe të tjera për ndërtim”, theksoi ministrja Hajdari.
