Sekretari Amerikan i Mbrojtjes, Lloyd Austin, nuk do të shkarkohet ndonëse nuk kishte njoftuar me ditë se ai ishte i shtrirë në spital, është thënë Shtëpia e Bardhë.
“Nuk ka asnjë plan tjetër pos që Sekretari Austin të mbetet në detyrë”, ka thënë zëdhënësi i Shtëpisë së Bardhë, John Kirby, në konferencë për media, raporton agjencia “AP”.
Kirby ka shtuar se Austin 70-vjeçar ka qëndruar në spital edhe të hënën.
Të dielën është bërë e ditur se u deshën tri ditë që presidenti i SHBA-së, Joe Biden, të informohej se Sekretari i Mbrojtjes është në spital.
Sekretari i Mbrojtjes është vetëm prapa presidentit në zinxhirin komandues të Ushtrisë amerikane dhe duhet të jetë në dispozicion gjatë gjithë kohës për të reaguar ndaj çdo emergjence të sigurisë kombëtare.
Dështimi i Pentagonit për të njoftuar me kohë për sëmundjen e Austinit është përcjellë me kritika.
Republikanët, përfshirë edhe Donald Trumpin, kanë kërkuar shkarkimin e Austinit.
Po ashtu edhe disa prej demokratëve kanë shprehur shqetësimin në lidhje me situatën.
Të hënën, Kirby ka thënë se Shtëpia e Bardhë do të shikojë se çfarë ka ndodhur.
“Përqendrimi numër një i presidentit është te shëndeti dhe rikuperimi i Sekretarit Austin dhe po shikon para që ai të kthehet në Pentagon sa më shpejt të jetë e mundur”, tha Kirby.
Të dielën, një zëdhënës i Pentagonit ka njoftuar se Austin i ishte nënshtruar një procedure mjekësore më 22 dhjetor dhe u lirua në shtëpi ditën tjetër.
Por, ai nisi të ndiente “dhimbje të mëdha” në pasditen e 1 janarit dhe u shtri në spitalin ushtarak “Walter Reed” në Washington.
Zëdhënësi i Pentagonit, gjeneral-majori Pat Ryder ka treguar se Sekretari i Mbrojtjes u shtri në njësitin intensiv.
Edhe pse u është kthyer detyrave të plota të premten, Austin ka mbetur në spital, por nuk është më në njësitin intensiv.
Austin të shtunën ka thënë se “e pranon se ka mundur të bëjë më mirë për të informuar publikun”.
