Ministri i Punëve të Jashtme të Maqedonisë së Veriut, Bujar Osmani ka thënë se bazuar në informacionet që ka, dhe nga pikëpamja e një organizate siç është NATO, nuk ka një rrezik për një përshkallëzim të menjëhershëm të një konflikti në Ballkan, konkretisht në Kosovë.
Por, sipas tij, ka lëvizje që shkojnë në drejtim të një eskalimi.
“Mirëpo se ka lëvizje të cilat mund të shkojnë në drejtim të një eskalimi të mundshëm, ajo është e vërtetë dhe NATO ndjek me vëmendje, dhe ne edhe si vend i rajonit ndjekim me vëmendje të gjitha këto lëvizje, por konstatimi është ky”, ka thënë Osmani në Rtv21.
Ai ka thënë se më i leverdishëm është integrimi i komunitetit serb në institucione në Kosovë, se sa organizimi në geto etnike.
Osmani është shprehur se një eksperiencë e tillë është edhe në Maqedoninë e Veriut, mirëpo sqaroi se dallojnë në numra, (marrë parasysh se komuniteti shqiptar është shumë më i lartë në numër në RMV, se sa komuniteti serb në Kosovë).
Ministri i Punëve të Jashtme të Maqedonisë së Veriut ka shtuar se aktualisht ka ndryshuar pikëpamje pas ngjarjes së 24 shtatorit në Banjskë, ngjarje e cila, sipas tij, kishte për qëllim vendosjen e kufijve të rinj.
