Hamasi nuk do të lirojë më asnjë peng të Izraelit nëse nuk do të ketë një ndërprerje të plotë të luftimeve. Pas vendosjes së një armëpushimi muajin e shkuar, më shumë se 100 pengje u liruan nga grupi militant, por rreth 120 të tjerë mbeten ende larg shtëpive të tyre.
Ata u rrëmbyen më 7 tetor kur edhe rinisi konflikti mes Izraelit dhe Hamasit.
Në një deklaratë, Hamasi bëri të ditur:“Kemi një vendim kombëtar të Palestinës që nuk do të ketë më bisedime rreth të burgosurve apo marrëveshje shkëmbimi derisa të ndalohet tërësisht agresioni.”
Mbetet e paqarë se për cilat fraksione të tjera palestineze bëhej fjalë në deklaratë. Xhihadi Islamik, një grup më i vogël në Rripin e Gazës, është ndër ata që dihet se po mban pengje izraelite.
Deklarata e ka vendosur qeverinë izraelite në një pozitë të vështirë. IDF deri më tani ka mbajtur qëndrimin se mënyra më e mirë për lirimin e pengjeve është presioni ushtarak ndaj Hamasit dhe organizimi i operacioneve të shpëtimit.
Por deri më tani vetëm një peng, Ori Megidish, është arritur të shpëtohet.
