Trajneri i Lille, Paulo Fonseca, ka lavdëruar sulmuesin kosovar, Edon Zhegrova.
Zhegrova tregoi aftësitë në një barazim 1:1 me Paris Saint-Germain, shkruan lajmi.net.
Fonseca në një intervistë për “L’Equipe” ka folur për paraqitjet e sulmuesit.
“Nuk mund të them shumë gjëra të mira për Edonin sepse përndryshe nesër (këtë të mërkurë) , ai do të mendojë se është më i miri në botë ”, tha trajneri i tij Paulo Fonseca me shaka të martën.
“Ai ka përparuar shumë, ka ndryshuar shumë. Sot ai është lojtar i ekipit. Kur mbërrita këtu, ai ishte një lojtar individual, i cili luajti një lojë ndryshe, një lojë individuale. Sot luan për ekipin, merr vendimin për skuadrën, kupton momentet e ndeshjes, kur duhet të driblojë, kur duhet të kalojë…”, tha ai.
Fonsecas i pëlqen edhe fakti që Zhegrova është përmirësuar edhe në mbrojtje.
“Pika në të cilën jam më i kënaqur është aspekti mbrojtës. Edoni është kthyer në një lojtar që ndihmon ekipin gjatë gjithë ndeshjes. Për mua, kjo është më e rëndësishmja”, shtoi ai.
Zhegrova iu bashkua Lillet në janar të vitit të shkuar nga Baseli, ndërsa me ekipin francez ka kontratë deri në verën e vitit 2026.
