Faruk Koca nuk është më president i klubit turk Ankaragucu. Ai ka dhënë dorëheqjen pas incidentit në mbyllje të ndeshjes me Rizespor, ku ka grushtuar gjyqtarin Halil Umut Meler.
“I kërkoj falje zotit Meler dhe familjes së tij, komunitetit të arbitrave turk, publikut sportiv dhe kombit tonë për sulmin tim ndaj gjyqtarit Halil Umut Meler. Asgjë nuk mund të legjitimojë apo shpjegojë dhunën”, thuhet në reagimin e tij të bërë në faqen e klubit.
Ngjarja ka ndodhur të hënën pas barazimit me rezultat 1-1 të ndeshjes mes Ankaragucu dhe Caykur Rizespor në kuadër të Superligës së Turqisë.
Kur gjyqtari ka sinjalizuar për përfundimin e ndeshjes, presidenti i Ankaragucu ka hyrë në fushë duke e goditur gjyqtarin kryesor me grusht. Referi pasi ka rënë në tokë është godiur edhe me shqelma nga zyrtarë të tjerë të klubit.
