Edhe një lajm i mirë ka ardhur sot për investimet në infrastrukturën e Kosovë.
Ministri i Mjedisit, Planifikimit Hapësinor dhe Infrastrukturës, Liburn Aliu tha se është lajm shumë i mirë që linja hekurudhore “Prishtinë – Aeroporti Ndërkombëtar Adem Jashari” si dhe linja R7, segmenti “Banullë – Carralevë”, po bëhen.
Organizuar nga Sekretariati i Përhershëm i Komunitetit të Transportit, në kuadër të procesit të modernizimit të transportit në gjashtë (6) vendet e Ballkanit Perëndimor, u mbajt takimi i Këshillit Ministror, ku ministri Aliu bashkë me ministrat e transportit nga shtetet fqinje, diskutoi progresin që është bërë në rrugë e hekurudha, lehtësimin e transportit, korridoret dhe lidhjen e shteteve të Ballkanit Perëndimor.
“Në këtë takim të frytshëm që tregoi se është bërë shumë progres, morëm lajmin e mirë që linja hekurudhore “Prishtinë – Aeroporti Ndërkombëtar Adem Jashari” si dhe linja R7, segmenti “Banullë – Carralevë”, tashmë janë përfshirë në rrjetin e TEN-t, dhe rrjedhimisht kemi qasje në fondet e BE-së, ku prej tyre 50% janë grante për projekte hekurudhore dhe 40% për ato rrugore”, bëri të ditur Aliu.
Ai tha se këtë organizim kanë prezantuar të arriturat e Kosovës rreth legjislacionit dhe direktivave të BE-së, progresin që është bërë në hekurudha e rrugë, ndërsa u diskutua edhe për forma të reja të transportit, të munguar deri më tani, me kosto më të ulët dhe për ndikime sa më të vogla në mjedis.
“U dakorduam që të vazhdojmë takimet koordinuese rreth synimeve afatgjata, në mënyre që të arrijmë objektivat e përcaktuara, dhe të punojmë së bashku drejt qëllimeve të përbashkëta”, tha mes tjerash Aliu.
