Në kuadër të takimeve në Samitin Botëror të Ndryshimeve Klimatike COP28 që po mbahet në Dubai, presidentja e Kosovës, Vjosa Osmani është takuar të shtunën me kryeministrin e Republikës së Çekisë, Petr Fiala e presidentin e Indonezisë, Joko Widodo
Osmani ka theksuar se Çekia është aleate e rëndësishme e Kosovës dhe një mbështetëse e madhe e rrugës euroatlantike të vendit.
“Gjatë COP28, falënderova kryeministrin Petr Fiala për mbështetjen e Çekisë dhe shprehëm angazhimin tonë për të vazhduar forcimin e lidhjeve tona dypalëshe”, ka shkruar Osmani në Twitter.
Me presidentin indonezian, që vazhdon të mos e njohë Pavarësinë e Kosovës, Osmani ka thënë se ka biseduar për potencialin e bashkëpunimit ndërmjet dy vendeve.
“E nderuar të takohem me presidentin indonezian, Joko Widodo, gjatë COP28. Theksova potencialin e bashkëpunimit ndërmjet Kosovës dhe Indonezisë në dobi të popujve tanë paqedashës dhe se si mund të kontribuojmë së bashku në adresimin e sfidave të përbashkëta globale”, ka shkruar Osmani.
