Asamblistët e Kuvendit Komunal të Prishtinës nga radhët e Lëvizjes Vetëvendosje sot kanë dorëzuar kërkesën për seancë të jashtëzakonshme me vetëm një pikë të rendit të ditës, raporton KosovaNews.
Në një njoftim thuhet se bëhet fjalë për faljen e tatimit në pronë për vitin 2023, deri në vlerën 100 euro.
“Ky veprim i yni ishte i nevojshëm meqenëse pushteti aktual në Prishtinë nuk e pa të udhës që këtë pikë të rendit të ditës ta trajtoj në seancën e sotme të rregullt”, thuhet në një njoftim që ka publikuar asamblisti Gëzim Sveçla.
Vendimi për faljen e tatimit në pronë duhet të merret nga kuvendi komunal i çdo komune, pasi një gjë të tillë e vendosi Gjykata Kushtetuese, e cila shqyrtoi këtë ligj pasi partitë opozitare në nivelin qendror kundërshtonin ligjin e miratuar nga Qeveria Kurti.
Kështu tani është në vullnetin e komunave që të vendosin nëse do të lehtësojnë barrën tatimore ndaj qytetarëve dhe të falin nga 100 euro nga tatimi në pronë.
