Në kuadër të aktiviteteve për shënimin e hapjes së zyrës së Unionit të Bizneseve Shqiptaro-Gjermane në
Kosovë, Kryetari Viqa dhe ekipi i tij u prit në takim nga Presidentja e Republikës së Kosovës, znj.Vjosa
Osmani.
Presidentja Osmani e uroi z.Viqa për hapjen e zyrës në Kosovë dhe e falënderoi atë për
kontributin e Unionit, si në aspektin ekonomik, ashtu edhe atë humanitar. Po ashtu, ajo e vlerësoi lart
rolin e diasporës sonë në zhvillimin ekonomik të vendit dhe rëndësinë e Unionit në aspektin e
investimeve të jashtme dhe eksportit të produkteve nga Kosova në tregun evropian.
Nga ana e tij, Kryetari Viqa e njoftoi presidenten me qëllimet dhe aktivitetet e Unionit, duke theksuar se
investimet në Kosovë, mbështetja për kompanitë lokale dhe ndihma për komunitetin do të vazhdojnë të
mbeten ndër objektivat kryesore të Unionit. Për realizimin e këtyre objektivave, ai shprehu gatishmërinë
për bashkëpunim të ngushtë dhe të vazhdueshëm me të gjithë faktorët relevant në Kosovë.
Ky takim shënon një hap të rëndësishëm në forcimin e bashkëpunimit reciprok midis Unionit të
Bizneseve Shqiptaro-Gjermane dhe institucioneve të Kosovës, në funksion të zhvillimit të qëndrueshëm
të vendit tonë dhe ndërtimit të një të ardhme më të mirë për të gjithë.
