Aleanca më e fuqishme ushtarake në botë, NATO, ka publikuar në rrjetet sociale një video përmbledhëse të vizitave të shefit të saj, Jens Stoltenberg, në Ballkanin Perëndimor.
Sipas NATO-s, vizita e Sekretarit të Përgjithshëm tregon se sa e përkushtuar është aleanca për të ruajtur paqen dhe stabilitetin në rajon.
Në mesin e shteteve ballkanike, Stoltenberg ka vizituar edhe vendin tonë Kosovën.
Ai në videon përmbledhëse shihet teksa takohet me kryeministrin e Kosovës, Albin Kurti si dhe me komandantin dhe disa ushtarë të KFOR-it.
“KFOR-i do të ofrojë sigurojë mjedis të sigurt për të gjitha komunitetet. Ne do të vazhdojmë ta bëjmë këtë në mënyrë të paanshme dhe sipas mandatit tonë të dhënë nga Kombet e Bashkuara. Stabiliteti varet nga të gjitha palët duke zgjedhur diplomacinë para dhunës. NATO fuqishëm mbështet dialogun Prishtinë-Beograd të lehtësuar nga Bashkimi Evropian. Të dyja palët duhet të angazhohen për mirëbesim”, dëgjohet duke deklaruar Stoltenberg.
Theksojmë se Stoltenberg ka vizituar edhe Maqedoninë e Veriut, ku është takuar me kryeministrat e vendeve të rajonit, të cilat janë anëtare të NATO-s.
Ndryshe, shefi i NATO-s ka vizituar vendet e rajonit pas paralajmërimeve të presidentit ukrainas, Volodymyr Zelensky, se Rusia do të përpiqet të nis një luftë të re në Ballkanin Perëndimor.
NATO Secretary General @jensstoltenberg visited the Western Balkans, reaffirming NATO’s commitment to keeping peace and stability in the region pic.twitter.com/yPIFnaW1VH
— NATO (@NATO) November 24, 2023
