Një deputete franceze e cila thuhet se është droguar nga një senator, e ka përshkruar situatën duke thënë se “dridhej dhe djersitej” e kishte frikë se po pësonte infarkt pasi piu shampanjë në të cilën i ishte hedhur edhe ekstazi.
Sandrinë Josso ka thënë se është ende në gjendje shoku pas incidentit javën e kaluar.
Por, ka theksuar se do që ta ngritë vëmendjen për drogat që mund t’u hedhen grave në pije në Francë. Ajo ka thënë se mund ta ndihmojë këdo.
“Çdokush mund të kalojë nëpër atë që kalova unë”, ka thënë ajo, raportoi Guardian.
Parlamenti francez u trondit javën e kaluar kur senatori Joel Guerriau u arrestua dhe u akuzua se i kishte hedhur drogë një deputeteje në pije, me qëllimin për ta përdhunuar.
Guerriau, i cili i mohon të gjitha akuzat, është suspenduar nga detyra.
Josso ka treguar se ishte ftuar nga senatori në një ndejë dhe aty ai i kishte mbushur gotën dhe në të i kishte hedhur drogë. Më pas, sipas saj, Guerriau vazhdimisht ndezte e ndalte dritën disa herë. Mjekët më pas i kanë thënë se kjo lëvizje e dritës e bën më të shpejtë efektin e drogës.
Ajo arriti ta thërrasë një taksi dhe të dilte nga apartamenti, e ku më pas u ndihmua nga kolegët parlamentarë dhe u dërgua në kontroll mjekësor.
