Kryeministri i Kosovës, Albin Kurti, në takimin e sotëm me OJQ-të dhe bizneset, ka njoftuar se nga tani këto dy të fundit do të mund të marrin statusin e ndërmarrjeve sociale
Në ceremoninë e lansimit të mundësisë së regjistrimit si ndërmarrje sociale të organizatave joqeveritare dhe bizneseve, Kurti tha se kjo do të mundësojë përkrahje më të madhe për personat me aftësi të kufizuara dhe persona të tjerë të marxhinalizuar.
“Për herë të parë në Kosovë, qeveria jonë mundëson që organizatat jo-qeveritare dhe bizneset të regjistrohen e të marrin statusin e ndërmarrjeve sociale”, ka thënë Kurti.
Përtej statusit si ndërmarrje publike ose private, ai ka theksuar se nëpërmjet këtij vendimi nevojat e cënueshme të shoqërisë do të marrin adresë.
“Lehtësirat të cilat do t’iu ofrojnë ndërmarrjeve sociale e inkurajojnë aktivizimin në tregun e punës të personave nga grupet e cënueshme, ndërkaq në anën tjetër sigurojnë rishpërndarjen e të hyrave për t’i shërbyer pikërisht këtyre grupeve. Edhe të rritet punësimi, por edhe mirëqenia”, ka deklaruar kryeministri.
Po ashtu edhe ministri i Financave, Punës dhe Transfereve, Hekruan Murati tha se kjo politikë do t’i ndihmojë grupet e cenueshme.
Murati, ka treguar se kompanitë ku 30% e punëtorëve janë nga grupet e cënueshme, mund të aplikojnë si ndërmarrje sociale.
Përfitimet janë që kompanitë ose OJQ-të lirohen nga tatimi në fitim.
“Ndryshe nga bizneset tradicionale të cilat kanë për qëllim maksimizimin e fitimit, ndërmarrjet sociale përdorin fondet e tyre për të avancuar misionin shoqëror, e në përkrahje të këtij misioni, ato pranojnë edhe lehtësira përgjatë operimit”, ka theksuar ministri Murati.
