Një zyrtar policor në Viti është arrestuar nga Inspektorati Policor i Kosovës për dyshimet se ka kryer veprën penale të “Kanosje” dhe “Pengim të personit zyrtar gjatë kryerjes së detyrës zyrtare”.
Lajmi është bërë i ditur nga Inspektorati Policor në një komunikatë për media e cila thotë se ata kanë marrë informacione nga Policia e Kosovës lidhur me rastin.
Sipas komunikatës, zyrtari policor dyshohet se ka kanosur dhe penguar disa zyrtarë të KEDS-it në Viti, të cilët ishin në detyrë dhe kishin mbështetjen e njësisë policore.
Pas pranimit të informacioneve, hetuesit e Inspektoratit Policor në bashkëpunim me prokurorinë kanë ndërmarrë veprime hetimore, rezultati i të cilave ka qenë arrestimi i zyrtarit policor.
Prokurori kompetent ka caktuar masën e ndalimit për 48 orë.
“Hetuesit e IPK-së në koordinim të plotë me Prokurorinë e Shtetit, do të vazhdojnë të ndërmarrin edhe veprime të tjera hetimore drejt ndriçimit të plotë të të gjitha rrethanave që ndërlidhen me këtë rast”, thuhet në njoftim.
