Disa burra në disa komuna të Kosovës janë arrestuar në 24 orët e fundit nën dyshimin për dhunë familjare ndaj grave. Të paktën pesë raste të tilla janë raportuar në raportin 24-orësh të Policisë së Kosovës. Në tri raste burrat janë dërguar në mbajtje, e në dy tjerat rastet kanë shkuar në procedurë të rregullt.
Rasti i parë është regjistruar në Fushë-Kosovë. Aty një burrë është arrestuar nën dyshimin se ka sulmuar fizikisht bashkëshorten dhe vajzën e tij. Viktimat kanë pranuar trajtim mjekësor, ndërsa i dyshuari është dërguar në mbajtje.
Në një tjetër rast në Fushë-Kosovë, një grua ka raportuar se disa muaj më parë ka pasur dhunë fizike nga bashkëshorti. Lidhur me këtë rast, është intervistuari i dyshuar dhe me urdhër të prokurorit, rasti është proceduar në procedurë të rregullt.
Në rastin tjetër, në Drenas, një grua ka raportuar se është sulmuar fizikisht nga bashkëshorti. Viktima ka pranuar trajtim mjekësor. Pas intervistimit, i dyshuari është liruar në procedurë të rregullt.
Në Prishtinë, një burrë është arrestuar nën dyshimin se po ashtu ka ushtruar dhunë fizike ndaj bashkëshortes. Atij i është sekuestruar një armë për të cilën, sipas Policisë, ka poseduar leje. Me vendim të prokurorit kujdestar, i dyshuari është dërguar në mbajtje.
Edhe në Junik është arrestuar një burrë nën dyshimin për veprën e njëjtë ndaj bashkëshortes. Viktimës i është ofruar trajtim mjekësor. I dyshuari është dërguar në mbajtje.
