Përmes raportit 24 orësh, Policia e Kosovës ka dhënë disa detaje për djegien e veturës së nëkryetares së Leposaviqit, Dragana Miletiq, ku mes tjerash thuhet se vetura ishte me targa vendore.
Sipas Policisë, rasti ka ndodhur në orët e para të së martës, në rrugën “24 Nëntori”, ndërsa nuk raportohet për të lënduar.
“Rr.24 Nëntori, Leposaviq 14.11.2023-01:30 Është përfshirë nga zjarri vetura me targa vendore pronë e ankueses femër serbe kosovare. Në vendin e ngjarjes kanë dalë njësitet përkatëse ndërsa, ekipi i zjarrfikësve ka lokalizuar dhe fikur zjarrin. Nuk raportohet për të lënduar. Lidhur me rastin është njoftuar prokurori”, thuhet në njoftim.
Bëhet e ditur se rasti është nën hetime.
Ndryshe, lidhur me këtë rast ka reaguar edhe Presidentja e vendit, Vjosa Osmani, e cila tha se ky veprim synon të përhapë frikë të serbët dhe të pengojë integrimin e tyre në institucionet e Kosovës.
