“Në aeroportin tonë të Kosovës ka pas policë të Izraelit, që kanë ardhur special të na kontrollojnë. Ne po shkojmë për sport jo të luftojmë”.
Kështu ka thënë sulmuesi kosovar, Vedat Muriqi, gjatë së shtunës në lidhje me një kontroll policor në aeroportin e Prishtinës, deklarim i cili ka bërë që Federata e Futbollit të Kosovës të dalë me sqarim.
Federata e Futbollit e Kosovës ka deklaruar se prononcimi i futbollistit Vedat Muriqi në lidhje me kontrollin policor në aeroportin e Prishtinës është keqkuptuar.
“Federata e Futbollit e Kosovës dhe futbollisti i ekipit kombëtar, Vedat Muriqi sqarojnë opinionin publik se prononcimi në lidhje me kontrollin policor në aeroportin e Prishtinës është keqkuptuar. Në prononcimin e tij të sotëm, futbollisti Muriqi i është referuar kontrollit të nënshtruar në muajin mars, para udhëtimit të ekipit kombëtar të Kosovës për në Tel Aviv dhe e ka ndërlidhur atë rast me nivelin e sigurisë për ndeshjen e 12 nëntorit”, thuhet në sqarimin e FFK-së.
Sipas komunikatës së lëshur nga FFK, futbollisti Muriqi i është referuar kontrollit të nënshtuar në muajin mars, para udhëtimit të ekipit kombëtar të Kosovës për në Tel Aviv dhe “e ka ndërlidhur atë rast me nivelin e sigurisë për ndeshjen e 12 nëntorit”.
“Përndryshe Federata e Futbollit e Kosovës është falënderuese për bashkëpunimin e madh të ofruar nga Policia e Kosovës dhe organet tjera shtetërore në lidhje me aspektin e sigurisë për organzimin e ndeshjes ndaj Izraelit”, thuhet në reagimin e Federates.
Sonte në orën 20:45, në stadiumin e qytetit “Fadil Vokrri” në Prishtinë, do të zhvillohet ndeshja kualifikuese përEURO2024, në mes të përfaqësueses së Kosovës dhe Izraelit.
