Gazetari i KIKS Kosova në Klan Kosova, Herolind Ademi, është kërcënuar me jetë nga një qytetar me inicialet B.B, duke i dërguar mesazhe telefonike, për shkak të hulumtimit që është duke realizuar për piraterinë e IPTV, ku ai është një nga subjektet.
“Haver, vec mbyllunse sakt ta kam adresen pot tregoj veq mbyllun dhe kos dil. Vec pot kallxoj terheku prej meje e mos munperzij se nuk han ma buk. Fol me kon dush pot kallxoj mos mu perzij ne pun te mija qe din me jetu edhe naj dit qikaq di met than pik”, thuhet në një pjesë të mesazhit shqetësues.
Lidhur me rastin është njoftuar Asociacioni i Gazetarëve të Kosovës.
AGK-ja, shpreh shqetësim të thellë dhe e konsideron si të papranueshëm dhe shumë të rrezikshëm mesazhin e këtij individi ndaj gazetarit.
“Redaksia e ka paraqitur rastin në Policinë e Kosovës, dhe AGK-ja, e fton Policinë që me urgjencë ta trajtojë rastin dhe të ndërmarrë të gjitha veprimet për t’i ofruar sigurinë e nevojshme gazetarit. Gjithashtu, organet e drejtësisë duhet ta bëjnë punën e tyre pas këtij kërcënimi, në mënyrë që puna e gazetarit dhe e redaksisë të vazhdojë në mënyrë të papenguar”, thuhet në reagimin e Asociacionit të Gazetarëve.
