Ukraina, Moldavia dhe Gjeorgjia morën lajme pozitive të mërkurën në lidhje me përpjekjet e tyre për t’u bashkuar me Bashkimin Evropian, ndërsa shtetet në rajonin e Ballkanit, që kanë pritur vite më shumë për t’u bërë anëtarë të bllokut më të madh tregtar në botë, u duk se rrëshqitën përsëri prapa.
Në një seri raportesh, Komisioni Evropian ka rekomanduar që Ukraina e shkatërruar nga lufta duhet të lejohet të hapë bisedimet e anëtarësimit, pasi t’i ketë adresuar disa mangësi.
Komisioni Evropian e lavdëroi Ukrainën, të cilën trupat ruse e pushtuan vitin e kaluar, duke thënë se qeveria “ka treguar nivel të jashtëzakonshëm fuqie institucionale, vendosmëri dhe aftësi për të funksionuar”. Por Komisioni ka njoftuar se bisedimet duhet të fillojnë vetëm pasi ta ketë trajtuar korrupsionin, shqetësimet e lobimit dhe një ligj për pakicat kombëtare.
Mesazh i ngjashëm iu dha edhe Moldavisë.
Gjeorgjisë iu tha se duhet të emërohej zyrtarisht si një kandidat për t’u anëtarësuar pasi t’i trajtojë mangësitë, duke përfshirë luftën kundër korrupsionit dhe mangësitë zgjedhore. Kjo nuk do të thotë se do të nisë së shpejti bisedimet për anëtarësim. Vendit do t’i duhet të largojë më shumë pengesa reformash përpara se kjo të ndodhë.
Propozimet e komisionit, të përshkruara në raportet vjetore të progresit, kryesisht ofrojnë udhëzime teknike për 27 vendet anëtare të BE-së se sa përparim kanë bërë vendet në përafrimin e ligjeve dhe standardeve të tyre me ato të bllokut.
Udhëheqësit e BE-së pritet të vendosin nëse do t’i miratojnë këto rekomandime në një samit në Bruksel më 14-15 dhjetor. Nuk ka asnjë garanci se ata do të bien dakord unanimisht për këtë. Hungaria dhe Sllovakia janë veçanërisht të ftohta për aspiratat e Ukrainës, për shembull.
Për 20 vjet, perspektiva e anëtarësimit në BE ka qenë shtytëse e fuqishme e reformave prodemokratike në vendet që duan të anëtarësohen. Por ato në Ballkan – Shqipëria, Bosnja, Mali i Zi, Serbia dhe Kosova – janë dekurajuar nga dështimi i bllokut për t’i përmbushur premtimet e anëtarësimit.
