Presidentja e Komisionit Evropian, Ursula von der Leyen, të mërkurën u ka bërë thirrje krerëve të Bosnjë-Hercegovinës “që të flasim me një zë”, pavarësisht grupeve të ndryshme etnike në vend, në mënyrë që të ecin para drejt anëtarësimit në Bashkimin Evropian, raporton agjencia “AP”.
Bosnjë-Hercegovina mori statusin e shtetit kandidat vitin e kaluar.
Von der Leyen të mërkurën ka vizituar Bosnjë-Hercegovinën, ndërsa përmbylli vizitën e saj në Ballkanin Perëndimor. Ajo të hënën vizitoi Kosovën, ku u takua me presidenten Vjosa Osmani dhe kryeministrin Albin Kurti.
Von der Leyen gjatë vizitës në Kosovë dhe Serbi, tha se Kosova duhet të fillojë me themelimin e Asociacionit e Serbia ta pranojë njohjen de facto të Kosovës.
“Mesazhi im i parë në parim rithekson se e ardhmja e Bosnjë-Hercegovinës është në Bashkimin Evropian dhe se sa shumë duam që t’ju kemi këtu. Puna që keni bërë në vitin tuaj të parë…tregon se shteti mund t’ia dalë”, ka thënë Von der Leyen.
Krerët e BE-së pas ndryshimit të rrethanave gjeopolitike, përfshirë pushtimit rus të Ukrainës, kanë vendosur t’i japin një shtytje procesit të integrimit dhe kanë inkurajuar shtetet e Ballkanit që të ecin para me reforma. Gjatë vizitës në rajon, Von der Leyen ka diskutuar në detaje edhe për pakon 6 miliardë euro për shtetet e Ballkanit Perëndimor.
Von der Leyen i ka bërë thirrje Bosnjës që të bëjë përparim drejt reformave demokratike, ndërsa po synon që formalisht t’i hapë negociatat për anëtarësim.
“Ajo që nuk mund të pranojë është rrëshqitje nga vlerat tona të përbashkëta, kjo vlen për çdo pjesë të vendit. Ne e dimë se për të arritur këtë objektivë për të ecur para, duhet që Bosnjë-Hercegovina të flasë dhe të ecë me një zë dhe si një. E ardhmja e Bosnjë-Hercegovinës është në Bashkimin Evropian si e tërë, e bashkuar dhe si shtet i pavarur”, ka thënë Von der Leyen.
