Kombëtarja e Anglisë ka ‘prerë’ biletën për në EURO 2024 pas fitores me rezultat 3-1 ndaj Italisë në ndeshjen e zhvilluar në “Wembley”.
Ishin mysafirët ata që dolën të parët në avantazh kur në minutën e 15-të Gianluca Scamacca shërbehet mjaft mirë në zonë nga Giovanni Di Lorenzo për të çuar topin në rrjetën e Pickford. (0-1)
Anglia barazoi shifrat në minutën e 32-të , ku penalltinë e fituar nga Jude Bellingham e konkretizoi në gol Harry Kane. (1-1)
Deri në përfundim të pjesës së parë nuk pati raste të mira shënimi dhe dy skuadrat shkuan në pushim mes pjesëve me rezultat të barabartë.
“Tre Luanët” e nisën fuqishëm pjesën e dytë ku arritën të shënojnë golin e epërsisë dhe të rikthimit në minutën e 57-të përmes Marcus Rashford, i cili me një goditje tejet precize e lë në ‘gjumë’ Gianluigi Donnarumman i cili nuk mundi të bëjë asgjë në atë rast. (2-1)
Goli i tretë dhe ai që vulosi fitoren e Anglisë, u shënua në minutën e 77-të ku edhe kësaj radhe protagonist për anglezët ishte Harry Kane i cili u tregua i pagabueshëm në një rast ballë për ballë me portierin. (3-1)
Me këtë fitore Anglia edhe matematikisht ka siguruar kualifikimin për në Evropian, ndërsa Italisë i janë vështirësuar punët pasi që tani ata renditen në pozitën e tretë në grupin C me tri pikë më pak se Ukraina, por me një ndeshje më pak të zhvilluar.
Muajin e ardhshëm Italia do ta ketë përballë Ukrainën dhe siç duket në atë sfidë do të vendoset se kujt do t’i takojë vendi i dytë dhe plasmani për në EURO 2024.
