Trepça ka mposhtur Vëllaznimin me rezultat 91:67 (23:17, 19:21, 18:14, 31:15), në javën e katërt të elitës së basketbollit kosovar.
Vendasit e nisën ndeshjen më mirë dhe kishin epërsi 7-8-9 pikë, ndërsa e fituan çerekun e parë 23:17. Megjithatë, kuqezinjtë u kundërpërgjigjën në periudhën e dytë, ku afruan rezultatin në 33:30, derisa pjesa e parë përfundoi 42:38.
Mysafirët nga Gjakova vazhduan me lojë të mirë dhe barazuan shifrat në 46:46, por nuk arritën të kalojnë për herë të parë në epërsi, megjithatë nga ky moment u këndellën ‘Xehetarët’ dhe deri në fund nuk lejuan “t’iu ikë fitorja nga duart”, duke qenë më të mirë deri në fund dhe duke triumfuar 91:67.
Te Trepça u dalluan Jordy Tshimanga me 19 pikë e katër kërcime, Dardan Kapiti me 13 pikë e gjashtë kërcime dhe Kevin Davis me 16 pikë, kurse te Jalen Ray shënoi 19 pikë, kurse Myredn Jones shënoi 15.
Trepça ka tri fitore e një humbje, kurse Vëllaznimi numëron katër humbje, duke qenë skuadra e vetme pa fitore në elitë.
Ndryshe, raportet mes Drilon Hajrizit dhe tifo-grupit “Torcida” duket se janë prishur sërish.
Por, tifozët e këtij grupi janë larguar nga pjesa ku qëndrojnë, shkaku i fyerjeve e sharjeve të vazhdueshme në kor. Ata u detyruan të largohen pas intervenimit të zyrtarëve policorë.
Megjithatë, fyerjet dhe sharjet nuk ishin në drejtim të kundërshtarëve, ashtu siç jemi mësuar t’i dëgjojmë në palestrat sportive të vendit tonë.
“Torcidat” vazhdimisht ato i drejtuan tek basketbollisti mitrovicas, Drilon Hajrizi, i cili është pjesë e Trepçës.
Nuk dihet ende se cila është arsyeja e krisjes së raporteve mes tyre.
