Ministri i Financave, Punës dhe Transfereve, Hekuran Murati tha se java që po lëmë pas, ishte tejet e ngarkuar por edhe mjaft produktive sepse janë nënshkruar marrëveshje për projekte zhvillimore në vlerë prej 79 milionë euro.
Ai tha se nga marrëveshjet e nënshkruara është edhe ajo ku përfitohen 61 milionë euro me KfW Gjermane për Parkun Solar 100 MW në KEK, ku 32 milionë euro prej tyre janë grant nga WBIF.
Po ashtu, janë edhe plus 9 milionë euro grant me qeverinë Zvicerane për rritjen e efikasitetit dhe efiçiencës në kompanitë rajonale të ujësjellësit, si dhe 9 milionë euro tjera grant nga fondet e BE-së me Bankën Botërore për përmirësimin dhe rehabilitimin e sistemeve të ujitjes për tokat bujqësore në Rrafshin e Dukagjinit.
“Pra 50 milionë euro grante që nuk ka nevojë të kthehen, dhe 29 milionë euro kredi me kushte koncesionale. Qeveria për Zhvillim!”, ka shkruar ministri Murati.
