Napoli e ka mirëpritur rikthimin e qendërmbrojtësit dhe kapitenit të Kosovës, Amir Rrahmanit. “Sportmediaset” ka shkruar të shtunën se Rrahmani është kthyer në përgatitje me skuadrën dhe pritet të jetë prej minutës së parë në fushë, në duelin kundër Veronës.
Verona – Napoli zhvillohet më 21 tetor, dhe i takon xhiros së nëntë të elitës së futbollit italian. Rrahmani u lëndua më 20 shtator në ndeshjen e Ligës së Kampionëve kundër Bragas në udhëtim, takim të cilin Napoli e fitoi 2:1.
Rrahmani kishte lëshuar fushën në minutën e 13-të. Për shkak të atij lëndimi, 29-vjeçari Rrahmani nuk u ftua te Kosova për ndeshjet e tetorit. Rrahmani ka katër paraqitje në të gjitha garat në edicionin aktual.
