Përfaqësuesja e Francës ka fituar derbin ndaj Holandës, Portugalia e ka mposhtur Sllovakinë dhe Belgjika ka triumfuar ndaj Austrisë në ndeshjet kryesore të natës së sotme (e premte) në kuadër të kualifikimeve për Euro 2024 dhe të tri këto kombëtare tashmë edhe matematikisht e kanë siguruar kualifkimin për në Gjermani.
Ndeshja më interesante e mbrëmjes padyshim se u zhvilluar në “Johan Cruijff Arena”, ku Franca u tregua e fortë për vendasit e Holandës duke i mposhtur me rezultat 2-1.
Të dy golat për francezët u shënuan nga Kylian Mbappe, i cili të parin e shënoi në minutën e shtatë dhe i dyti ishte një supergol në minutën e 43-të. Për vendasit shënoi Quilindschy Hartman (83′).
Pas kësaj fitore, Franca udhëheq Grupin B me 18 pikë dhe siguron kualifikimin në Euro 2024, ndërsa Holanda renditet e treta me nëntë pikë.
Në ndeshjen tjetër, Belgjika ka fituar me rezultat të ngushtë 3-2 në udhëtim te Austria në ndeshjen e vlefshme për Grupin F.
Dodi Lukebakio shënoi dy gola, në minutat 12-të dhe 55-të, Romelu Lukaku (58′) shënoi të tretin, ndërsa Konrad Laimer (73’) dhe Marcel Sabitzer (84′) shënuan për vendasit.
Me këtë fitore, belgët e kanë siguruar matematikisht kualifikimin në “Euro 2024”, pasi ka 16 pikë apo 10 më shumë se Suedia e treta që ka edhe tri ndeshje.
Nga kombëtaret e mëdha fitore mori edhe Portugalia, e cila në shtëpi fitoi me rezultat 3-2 ndaj Sllovakisë në ndeshjen e Grupit J.
Golat për portugezët u shënuan nga Goncalo Ramos (18’) dhe Cristiano Ronaldo (29’, 72′), ndërsa për sllovakët shënoi David Hancko (69’) dhe Stanislas Lobotka (80′).
Pas kësaj fitore, Portugalia ka 21 pikë në pozitën e parë dhe siguron kualifikimin në Euro 2024, ndërsa Sllovakia renditet e dyta me 13 pikë.
