Policia në Shqipëri ka ndaluar 4 persona në Tiranë, pasi ata kishin reklamuar dhe kishin ofruar për shitje bileta për ndeshjen e sotme Shqipëri – Çeki, për 400 euro copën.
Siç ka bërë të ditur Policia e Shqipërisë, katër të dyshuarit kishin krijuar skemë mashtrimi për shitjen e biltetave.
“Specialistët për Hetimin e Krimeve Ekonomike dhe Financiare në DVP Tiranë, në vijim të punës për goditjen e veprimtarive kriminale, pas informacioneve të siguruara për disa shtetas, të cilët reklamonin në rrjete sociale dhe shisnin me anë të mashtrimit, bileta për ndeshjen e ditës së sotme, me çmime shumë të larta, menjëherë kanë organizuar punën për identifikimin dhe vënien e tyre përpara përgjegjësisë ligjore. Në vijim të veprimeve u referuan materialet në Prokurori dhe nisi procedimi në gjendje të lirë për shtetasit S. A., 35 vjeç, R. H., 22 vjeç, A. O., 31 vjeç dhe E. Gj., 34 vjeç, të katërt banues në Tiranë. Nga veprimet hetimore ka rezultuar se këta shtetas kishin krijuar një skemë mashtrimi për shitjen e biletave për ndeshjen Shqipëri-Çeki, me çmime që shkonin deri në 400 euro. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme”, thuhet nga Policia e Shqipërisë.
Shqipëria sonte në “Air Albania” në Tiranë zhvillon ndeshjen vendimtare elminatore për “Euro 2024” kundër Çekisë. Një fitore do ta kualifikonte Shqipërinë në Evropian.
Kërkesat për bileta kanë qenë të shumta, ndërsa biletat kanë nisur të shiten me çmime të larta në treg të zi.
