Grupi i specializantëve ka protestuar të martën për të shprehur pakënaqësinë e tyre në lidhje me mospagesën e kujdestarive sipas Ligjit të ri të pagave, si dhe për mospagesën e subvencioneve për kujdestaritë që ka filluar që nga muaji shkurt.
Ata bënë thirrje që kërkesat e tyre të vazhdueshme të merren parasysh dhe që situata të zgjidhet sa më shpejt.
Arianit Zajmi, një nga përfaqësuesit e grupit, ka theksuar se specializantët janë detyruar të paguajnë 500 euro për vitin e shkollimit specialistik.
“Detyrohemi me pagu nga 500 euro në vit, që i bie për pesë vjet me pagu 2500 euro, kjo nuk ka qenë më përpara. Prej muajit shkurt, nuk e kemi marrë asnjë cent për kujdestari. Specializantët po paguhen me çmime fikse për kujdestaritë”, është shprehur ai.
Zajmi, po ashtu, bëri me dije se prej muajit shkurt, ata nuk kanë marrë asnjë shumë për kujdestaritë, ndërsa janë të detyruar të paguhen me çmime të caktuara për kujdestaritë, që është një situatë e re dhe e vështirë për ta.
“Protestat do të vazhdojnë çdo ditë dhe masat do të radikalizohen nëse kërkesat tona nuk merren seriozisht në konsideratë,” shtoi Zajmi.
Ai ka informuar, gjithashtu, se janë zhvilluar takime me Ministrinë. Edhe pse, sipas tij, ministri ka marrë vendim që të paguhen kujdestaritë, ky vendim nuk po respektohet.
