Më tepër se 600 izraelitë janë vrarë që kur militantët palestinezë të grupit “Hamas” nisën një sulm masiv të shtunën, raporton BBC. Mbi 2000 raportohet se janë lënduar.
Ndërkohë në Rripin e Gazës, Ministria e Shëndetësisë ka njoftuar se 313 janë vrarë nga sulmet ajrore izraelite, e janë lënduar mbi 2000.
Forcat e Mbrojtjes së Izraelit kanë bërë të ditur se po vazhdon luftimi me militantët palestinezë. Kanë thënë se janë vrarë mbi 400 militantë palestinezë në jug të Izraelit dhe në Rripin e Gazës e janë arrestuar disa tjerë.
Ndërkohë “BBC” ka publikuar një video ku shihen forcat izraelite duke shkëmbyer zjarr me militantët palestinezë në rrugën mes Ashdodit dhe kufirit me Gazan. Video pretendohet se është bërë të dielën.
Kabineti i Sigurisë i Izraelit mbrëmë ka votuar që ta shpallë zyrtarisht gjendjen e luftës dhe për t’i mundësuar “ushtrisë të kryejë aktivitete të mëdha ushtarake”, ka njoftuar Zyra e Kryeministrit të Izraelit.
Kryeministri i Izraelit, Benjamin Netanyahu, kishte thënë të shtunën në mëngjes se shteti i tij është në luftë pasi që militantët e Hamasit sulmuan jugun e Izraelit.
Nga Forcat e Mbrojtjes së Izraelit është bërë e ditur se shkollat do të mbesin të mbyllura në të gjithë vendin.
