Kryeministri i Shqipërisë, Edi Rama, ka thënë se Serbia duhet të ndëshkohet për veprimet e 24 shtatorit në veri të Kosovës pa u bërë shumë vonë.
Para gazetarëve në Granada të Spanjës ku ka filluar samiti i Komunitetit Politik Evropian, Rama ka theksuar se sjellja e Serbisë pas sulmit në Banjskë ka qenë e mjaftueshme që BE-ja ta dënojë dhe ndëshkojë atë.
“Fakti që Serbia shpalli ditë zie për anëtarët e atij grupi kriminal paramilitar që vrau policin, ishte e mjaftueshme që BE-ja të thoshte se kjo nuk është evropiane, nuk është e pranueshme dhe kjo është e ndëshkueshme. Lufta është një fjalë e madhe, por para se të jetë shumë vonë, masa duhet të ndërmerren. Ka vullnet të fortë dhe ka lëvizje brenda NATO-s që të forcojë KFOR-in në veri sepse në kufirin atje ka ndodhur gjithfarë trafikimi armësh. Shpresojmë se dialogu të rikthehet”, ka thënë ai.
Rama, ka vlerësuar se situata në veriun e Kosovës është shumë e rrezikshme dhe se aktivitetet kriminale atje janë në përputhje me agjendat politike.
Ndërkaq, kur pyetet nëse mund të ketë luftë në Ballkanin Perëndimor, Rama thotë se para se të bëhet shumë vonë, duhet të ndërmerren masat.
“Lufta është fjalë e madhe, por para se të bëhet shumë vonë, duhet të merren masa. Jemi duke e përcjellë situatën, është shumë me rëndësi se ka vullnet shumë të fuqishëm nga NATO-ja që ta forcojë KFOR-in në veri, sepse kufiri atje është bërë krejtësisht transparent, ndodhin trafikime kriminale të armëve, dhe në të njëjtën kohë shpresojmë shumë se dialogu do të vazhdojë”, shtoi ai.
Ndryshe, rreth 50 liderë evropianë pritet të takohen në Granadë të Spanjës të enjten, në kuadër të një mbledhjeje të zgjeruar të quajtur Komuniteti Politik Evropian, me fokus në përmirësim të bashkëpunimit, pavarësisht përkeqësimit të konflikteve dhe të tensioneve në kontinent.
Takimi i tretë i tillë organizohet për t’iu dhënë shteteve mundësi për ta zgjeruar dialogun përtej kufijve të bllokut evropian me 27 anëtarë.
Ky organizim mëton të rrisë mundësitë për liderët që të takohen në grupe më të vogla për takime joformale, pa simbolikën dhe protokollet e vizitave shtetërore.
