Ish- kryeministri i Kosovës Agim Çeku kërkoi ngritjen e kapaciteteve ushtarake e policore, pas sulmit terrorist në veri të vendit më 24 shtator që shumë dëshmi tregojnë se është financuar e organizuar nga Serbia.
Ai bëri këtë kërkesë gjatë diskutimeve të një tryeze që ka organizuar subjekti politik AAK lidhur me situatën në veri të vendit.
“Pa marrë parasysh se çfarë ka ndodhur, sot kur po flasim këtu, mendoj se situata e sigurisë sot në Kosovë është stabile, por na është ofruar edhe një mundësi shumë e madhe që këtë stabilitet ta fuqizojmë, avancojmë dhe ta bëjmë sa më të qëndrueshëm. Sepse në qoftë se dimë t’i nxjerrim mësimet nga ajo ditë, është më së e qartë që Serbia është etiketuesi sponsor dhe tani është në një pozicion shumë më të dobët se sa ka qenë para të dielës.
Pas raundit të fundit të bisedimeve Serbia ka qenë një pozitë më 14 shtator, në një pozicion më të favorshëm, ka qenë një mbështetje më e madhe për qëndrimin e tyre në procesin e dialogut, sesa për Kosovën, por tani ajo është në fazën e shfajësimit nga ky veprim destabliziues dhe veprim terrorist. Ka humbur eksponentë ekstremistë, autoritetin e tyre, fuqia e tyre, duke filluar nga vet presidenti i Serbisë. Në anën tjetër ne kemi dalë faqebardhë, fitues. Reagimi ka qenë i suksesshëm. Fatkeqësisht e kemi paguar një çmim të lartë me humbjen e një polici. Por, ajo që është pozitive është se Policia jonë pati një veprim real, ku u përcoll edhe me taktikë dhe veprime reale, u sprovua dhe këtë kontekst e dha me sukses. U pa që Kosova ka kapacitete, potencial për të mbrojtur veten e sovranitetin”, tha Çeku.
Çeku që për një kohë ishte edhe komandat i përgjithshëm i FSK-së, mes tjerash ka kërkuar edhe ngritjen e kapaciteteve ushtarake e policore.
Sipas tij, Kosova duhet të fokusohet në politikën e jashtme, sipas tij, duhet të jetë më bindëse në këtë drejtim.
“Mendoj se është krijuar një momentum i ri, i favorshëm që të rishikohen nga niveli taktik i njësisë speciale, deri tek niveli strategjik në nivel shteti dhe në bashkëpunim me partnerët tanë se si ta përmirësojmë, avancojmë sistemin e sigurisë tonë. Siguria mbështetet në pesë shtylla. E para dhe më e rëndësishmja është politika e jashtme, duhet të jetë super aktive dhe bindëse, sepse është ajo që krijon partneritete dhe miqësi të reja. Kështu, apeloj se politika e jashtëm të jetë shumë bindëse në këtë drejtim dhe të kryej detyrat e veta. Tjetër është, ndërtimi i kapaciteteve dhe koncepteve të mbrojtjes, është ushtria e vendit. E treta është Policia, inteligjenca që është kryqe në paralajmërimin e hershem, dhe e fundit është plani kombëtar i reagimit, me çfarëdo lloj emergjence e krizë”, vijoi Çeku.
