Organizatori i sulmit terrorist në Banjskë të Zveçanit më 24 shtator, krimineli Millan Radoiçiq u arrestua sot.
Kështu raportojnë mediat serbe duke iu referuar Ministrisë së Punëve të Brendshme e Serbisë, të cilët po ashtu thonë se janë bastisur banesa dhe lokalet e tjera që janë pronësi e Radoiçiqit.
“Më 3 tetor 2023, policët e Drejtorisë së Policisë Kriminale kanë bastisur banesën dhe lokalet e tjera të Milan Radoiçiqit, i cili është urdhëruar të mbahet nga policia deri në 48 orë dhe është sjellë në Prokurorinë e Lartë Publike në Beograd me kallëzim penal”, thotë MPB-ja e Serbisë, raportojnë mediat.
Vlen të theksohet se shteti i Serbisë e ka pranuar se Radoiçiq ndodhet në territorin e saj pasi iki nga ndjeka e Policisë së Kosovës. Por autoritetet serbe nuk kanë publikuar deri tani asnjë fotografi apo pamje të terroristit që ka marrë përgjegjësinë për ngjarjet në fshatin Banjskë, sipas një deklarate të lexuar për media nga avokati i tij, Goran Petronijeviq.
Ndërkaq krerët shtetërorë të Kosovës, kanë kërkuar që Radojçiq të ekstradohet në Kosovë në mënyrë që të gjykohet për veprat e tij kriminale e terroriste.
Janë bërë një javë nga sulmi terrorist ndaj Policisë së Kosovës, që ndodhi në Banjskë të Zveçanit, ku i vrarë mbeti rreshteri Afrim Bunjaku dhe u plagos zyrtari tjetër policor Alban Rashiti.
Që nga ajo e ditë (e diel) e deri më tani Policia e Kosovës ka vazhduar me operacionet e saja ku ka konfiskuar arsenal armësh në zonën ku ndodhi sulmi, duke përfshirë këtu: granatahedhës, antiplumb, karikator me fishekë, kapela ushtarake, dorëza, pushkë gjuetie, snjaper, radiolidhje etj.
