Kryeministri i Kosovës, Albin Kurti ka thënë se takimin e pestë në kuadër të dialogut ndërmjet nivelit qendror dhe lokal, e kanë nisur siç ka thënë ai, me një mirëseardhje të veçantë për Kryetarët e Komunave anëtare të reja të Asociacionit të Komunave të Kosovës: Ilir Peci, Kryetar i Komunës së Zveçanit, Izmir Zeqiri, Kryetar i Komunës së Zubin Potokut dhe Erden Atiq, Kryetar i Komunës Veriore të Mitrovicës.
Buxheti i komunave për vitin 2024, sipas Kurtit, arrin në 742 milionë euro.
“Po bëhet tashmë viti i dytë radhazi që rritja e buxhetit është në përqindje dyshifrore krahasuar me vitin paraprak. Në vlerë absolute, buxheti i vitit 2024 është për gati 90 milionë euro më i lartë krahasuar me vitin 2023. Kurse nga fillimi i mandatit, për tri vite, buxheti vjetor i komunave është rritur për 195 milionë euro më shumë”, ka thënë Kurti.
Ai ka thënë se kryetarët e komunave i ka falënderuar për solidaritetin dhe mbështetjen e treguar ndaj Policisë së Kosovës, në këto ditë të vështira të përballjes me kriminelët dhe me terroristët.
“Kryetarët i falënderova për solidaritetin dhe mbështetjen e treguar ndaj Policisë së Kosovës, në këto ditë të vështira të përballjes me kriminelët dhe me terroristët, në një betejë që e fituam, e në të cilën ra heroikisht rreshteri i policisë, Afrim Bunjaku. Për të, e në nder e kujtim të tij, mbajtëm një minutë heshtje”, thuhet mes tjerash në njoftimin e kryeministrit Kurti.
