Presidentja Vjosa Osmani në Ditën Kombëtare të Boshnjakëve ka dekoruar disa nga personalitetet e shquara boshnjake, teksa ka thënë se me popullin boshnjak ndajmë historinë e njëjtë të dhimbjes dhe gjenocidit. Tutje e para e shtetit ka thënë se synimet hegjemoniste të Serbisë nuk po ndalen as sot, por që Kosova me sovranitetin e saj është shtëpia e të gjithëve.
“Ne ndajmë një histori të përbashkët të dhimbjes, vrasjeve, persekutimeve e deri te gjenocidi i kryer kundër nesh. Por jemi krenar që arritëm t’ia dalim e të ndërtojmë paqen mbi gërmadhat e së kaluarës jo të largët. Synimet hegjemoniste të Serbisë nuk po ndalen as sot, siç ndodhi edhe me sulmin e fundit terrorist e aktin e agresionit kundrejt vendit tonë ku u vra heroi i Kosovës, Afrim Bunjaku. Por në këtë përpjekje të vendosjes së rendit e ligjit dhe të mbrojtjes së sovranitetit nuk do të zmbrapsemi asnjëherë dhe do të jemi përherë bashkë. Kosova është shtet përgjithmonë dhe shtëpi e të gjithëve”, ka thënë Osmani.
Tutje ka shtuar se populli i Kosovës i është mirënjohës popullit boshnjak për kontributin historik në promovimin e vlerave të përbashkëta demokratike.
“Kjo ditë na e kujton peshën që komuniteti jo shumicë, përfshirë atë boshnjak, kanë në jetën demokratike të Republikës sonë dhe është një mundësi e shkëlqyer për t’i vlerësuar edhe një herë të arriturat tuaja të deritanishme, rolin tuaj në procesin e lirisë dhe shtetndërtimin e Kosovës”, ka thënë Osmani.
Ajo dha dekoratën post-mortem – medaljen presidenciale të meritave për profesor doktor Alia Gjogoviq, derisa u nderuan edhe artisti i shquar e anëtari i ASHAK-ut, Jashar Rexhepagiqi dhe humanistit Nuredin Jonuzi. Ndërkaq medalja “Urdhëri i Lirisë” iu nda luftëtarit të UÇK-së, Nehat Demiri, për meritat e çlirimit të atdheut të përbashkët.
“Me angazhimin tuaj historik, me pjesëmarrje në të gjitha sferat e jetës në Kosovë nga arsimi te kultura e deri tek ekonomia e zhvillimi, ju jeni shndërruar në kontribues të rëndësishëm për promovimin jo vetëm të të drejtave të boshnjakëve, por edhe për mozaikun tonë të përgjithshëm kulturor e gjuhësor”, ka thënë presidentja e vendit.
