Ministria e Financave ka nënshkruar të enjten marrëveshjen për Projektit për Qeverisje Digjitale me Asociacionin Ndërkombëtar për Zhvillim të Bankës Botërore, nëpërmjet të cilës arrihet qeverisja digjitale.
Në ceremoninë e nënshkrimit të marrëveshjes, ministri i Financave, Hekuran Murati ka thënë se kjo nismë ndikon në zhvillimin digjital të shërbimeve publike për qytetarët.
“Projekti prej 20 milionë eurosh synon digjitalizimin e shërbimeve nga administrate publike e rrjedhimisht edhe ngritjen e cilësisë të shërbimeve për qytetarët. Projekti përbëhet nga tri pika; transformimi digjital i qeverisë; transformimi digjital i ofrimit të shërbimeve publike dhe; forcimi institucional dhe menaxhimi i projektit”, tha Murati.
Drejtori i Bankës Botërore për Kosovë dhe Maqedoni, Massimiliano Paolucci tha se të mirat e kësaj marrëveshje janë të shumëfishta.
“Digjitalizimi i suksesshëm i shërbimeve do të shtojë përpjekjet e Kosovës për luftën ndaj korrupsionit, duke përmirësuar punësimin e grave dhe luftimin e ndryshimeve klimatike”, u shpreh Paolucci.
Zëvendësministri i Punëve të Brendshme, Bardhyl Dobra tha se digjitalizimi është kyç për funksionimin e administrates publike.
“Pjesë e gjithë kësaj është reduktimi i barrës së administrates që do të thotë reduktimin e procedurave byrokratike të panevojshme dhe digjitalizimin e shërbimeve. Rezultati që presim pas gjithë kësaj pune është rritja e llogaridhënies dhe transparences në administrate publike”, u shpreh Dobra.
