Profesori i shkencave politike në njërin nga universitetet e Parisit, Nezir Kraki ka reaguar pas ngritjes së diskutimeve nëpër studion televizive për gjetjen e fajtorit për sulmin terrorist që kryen në veri të Kosovës një grup i serbëve të uniformuar që erdhën nga Serbia dhe pas shpartallimit nga Policia e Kosovës ikën dhe u strehuan po në Serbi.
Në një reagim të shkruar në rrjetin social, Kraki ngre alarmin se qytetarët nuk duhet të bien pre e lajmeve që ndërtohen mbi bazën e informatave te BIA-s serbe, e të cilat dalin të redaktuara në shqip nga ata që të gjithë i njohin.
“Komitat e batonave veç e kanë fillu fushatën mediatike me qëllimin që Serbia mos të shihet shumë fajtore për sulmin terrorist dhe Vuçiqi mos të del keq përpara perëndimit.
Prandaj ne debate, ne portale e rrjete sociale hetohet tentimi me i gjet dështime e gabime Kosovës për ndërhyrjen atje dhe në të njëjtën kohë relativizohet e kamuflohet roli direkt i Vuçiqit.
Mos bini pre e lajmeve që ndërtohen mbi bazën e informatave të BIA-s serbe, të redaktuara në shqip nga ata që të gjithë i njihni”, ka shkruar në reagimin e tij Kraki.
Tutje ai ka shtuar që mos të dëgjohen as ata që në 10 vite bisedime veç e kanë përforcu pozitën e Serbisë dhe rolin e saj sabotues mbi Kosovën.
“Ata kanë halle tjera. Kosova është ne rrugën e duhur dhe kushdo që e pengon në këtë rruge është armik i saj”, ka thënë mes tjerash ai.
