Ministri për Komunitete dhe Kthim në Qeverinë e Kosovës, Nenad Rashiq, për mediumin serb “Nova.rs” ka thënë se dy sulmues janë vrarë në afërsi të fshatit Banjskë të Zveçanit, ndërsa një është plagosur. Po ashtu ai ka thënë se është arrestuar edhe një sulmues tjetër.
Rashiq ka thënë se nuk ka informata nëse do të ndodhë dorëzimi i pjesëtarëve të grupit kriminel.
Rreshteri policor Afrim Bunjaku ka humbur jetën në një sulm në afërsi të fshatit Banjskë në mëngjesin e të dielës, ndërsa janë lënduar dy policë tjerë.
“Situata është dramatike. Jam dëgjuar më herët me ministrin Xhelal Sveçla. Së fundi ka dalë lajmi se në atë përleshje kanë mbetur të vrarë disa persona. Mëngjesin e sotëm policia u ka dërguar kërkesë për dorëzim, por nuk ka asnjë komunikim apo kontakt mes dy palëve. Policia thërret me megafon sulmuesit, por nga ana tjetër nuk ka përgjigje. Situata rreth manastirit në fshatin Banjskë është ende dramatike, nuk ka shenja se do të qetësohet së shpejti”, ka thënë Rashiq, duke iu referuar burimeve nga Policia e Kosovës.
Rashiq ka thënë se KFOR-i po punon në ndërmjetësimin për momentin, për ta qetësuar situatën.
“Ajo diplomaci duhet t’i bindë apo detyrojë njerëzit të dorëzohen, sepse askush nuk është i interesuar për gjakderdhje të mëtejshme apo përkeqësim të situatës”, ka thënë Rashiq.
Rashiq ka thënë se sulmuesit ndodhen brenda dhe rreth manastirit të Banjskës.
“Një numër sulmuesish janë brenda manastirit, ndërsa disa rreth vetë manastirit. Tash për tash askush nuk e di se kush janë sulmuesit, përveç se bëhet fjalë për një grup të armatosur mirë dhe të organizuar. Nga një burim në MPB kam dëgjuar se ata persona kanë pasur armë dhe mortaja. Ky armatim kërkon shumë logjistikë. Kjo është ajo që ne e dimë tash për tash. Gjëja më e rëndësishme, siç thonë Kurti e Sveçla, është se nuk jemi për përshkallëzim të mëtejshëm, por për një zgjidhje paqësore të situatës”, ka thënë Rashiq.
