Ish-zyrtari i FBI-së, Charles McGonigal, është deklaruar këtë të premte fajtor në gjykatën federale të Washingtonit, duke pranuar se ka fshehur pagesa sekrete të bëra në drejtim të tij nga një ish-zyrtar i inteligjencës shqiptare.
McGonigal pranoi se ka falsifikuar të dhënat dhe ka bërë deklarata të rreme në lidhje me 225,000 dollarët që mori nga ish-agjenti i inteligjencës shqiptare, gjatë kohës që punonte për FBI-në.
Sipas deklaratës së Departamentit të Drejtësisë në SHBA, ish-agjent i posaçëm i Byrosë Federale të Hetimit i ngarkuar me detyrë në zyrën e New Yorkut, pranoi pas marrëveshjes me prokurorët se 225,000 dollarët i ka marrë nga një individ që kishte interesa biznesi në Evropë, teksa po mbikëqyrte punën e kundërzbulimit.
Deklarata e fajësisë së 55-vjeçarit u pranua nga gjyqtarja e qarkut, Colleen Kollar-Kotelly, e cila përcaktoi 16 shkurtin e vitit të ardhshëm si datën kur do të zhvillohet seanca gjyqësore, ku McGonigal do t’i komunikohet dënimi.
“Sipas dokumenteve të depozituara në Gjykatë, nga gushti 2017 dhe duke vazhduar deri në pensionimin e tij nga FBI në shtator 2018, McGonigal fshehu nga FBI natyrën e marrëdhënies së tij me një ish-oficer të huaj sigurie dhe një biznesmen i cili kishte interesa të vazhdueshme biznesi në vendet e huaja dhe me qeveritë e huaja. Në mënyrë të veçantë, McGonigal mori të paktën 225,000 dollarë para në dorë nga individi dhe udhëtoi jashtë vendit me individin, ku u takua me shtetas të huaj. Individi më vonë shërbeu si një burim i FBI-së në një hetim penal që përfshinte lobim politik të huaj mbi të cilin McGonigal kishte përgjegjësi zyrtare mbikëqyrëse”, thuhet në deklaratën e Departamentit të Drejtësisë së SHBA-së.
McGonigal dyshohet se ka marrë pagesën me gjashtë shifra nga një njeri i identifikuar në mediat evropiane si Agron Neza dhe ka bërë favore në këmbim të tillë si takimi me kryeministrin e vendit, Edi Rama.
Në kuadër të akuzave të tij, thuhet se ai kishte udhëtuar në Kosovë, nën shoqërinë e Ramës për t’u takuar me një politikan kosovar.
