Arrestimet e fundit që ndodhën në Komunën e Ferizajt dhe për të cilat ka raportuar ekskluzivisht KosovaNews, kanë nxitur edhe reagimin e partisë opozitare në këtë komunë, ku thuhet se pushtetet lokale janë karakterizua vazhdimisht me dallavere e shkelje të shumta.
Qendra e Lëvizjes Vetëvendosje në Ferizaj thotë se skandalet e pushteteve edhe pse me vonesë, po dalin sheshit!
“Të dashur qytetar, Qendra e Lëvizjes VETËVENDOSJE! në Ferizaj vazhdimisht ka përcjellë aktivitetin politik të pushtetit lokal si opozitarizëm konstruktiv për të garantuar që shërbimet ndaj qytetarëve të jenë prioritet dhe që sundimi i ligjit të jetë kryefjala e secilit pushtet.
Por ja që pushtetet në vazhdimësi po përcillen me skandale e në fund faturën po e paguan qytetari”, thuhet në reagimin e këtij subjekti.
Tutje nga VV thuhet se ditëve të fundit është arrestuar një ish zyrtar, arkitekt në Drejtorinë e Urbanizmit dhe Mjedisit dhe një përfitues i një tenderi pasi të njëjtit dyshohet se duke keqpërdorur detyrën zyrtare konkretisht duke nënshkruar jashtëligjshëm situacionet dhe një aneks kontratë pa bërë fare verifikimin e punëve në teren i kanë mundësuar përfitim material një kompanie si dhe i kanë shkaktuar dëm buxhetit të Komunës vlerën prej 67.659.41 Euro të taksapaguesve.
Po ashtu, Policia e Kosovës ka njoftuar mbi arrestimin e zyrtarit të gjendjes civile me inicialet B.Xh i cili deri sa ishte në pozitën e ofiqarit kishte keqpërdorur pozitën duke regjistruar jashtëligjshëm një shtetas turk pa i plotësuar kriteret e fitimit të shtetësisë duke i’a mundësuar kështu marrjen e letërnjoftimit si dhe pasaportës së Republikës së Kosovës.
“Lojën e pistë të LDK-së e PDK-së si dhe patericave të tyre në Ferizaj e karakterizojnë këto lloj sjelljesh e pothuajse janë identik në mënyrën se si qeverisin e manipulojnë por tash me ndryshimin e madh në skenën politike të Kosovës e me ardhjen në pushtet të Qeverisë Kurti edhe ingranazhet e drejtësisë, mbase pak ngadalë por sigurt po lëvizin në përndjekje të PANLA-ve!:, thuhet mes tjerash në reagimin e Vetëvendosjes.
