Kryetari i Gjykatës së Lartë të Podgoricës, Boris Saviq, ka thënë se pas zbulimit të tunelit në depon e gjykatës, është konstatuar se në pesë lëndë në proces mungonin armët.
Këshilli Gjyqësor i Malit të Zi diskutoi për tunelin e hapur nën Gjykatën e Lartë dhe përgjegjësinë eventuale të kreut të atij institucioni, Boris Saviq, shkruan portali RTCG.
Duke folur për rastin “Tuneli”, Saviq ka thënë se deri më tani kanë konstatuar se në pesë raste mungojnë provat.
“Sipas gjendjes aktuale i kemi pesë raste në të cilat na mungojnë armët, për momentin jemi duke punuar në rreth 450 raste dhe në ato pesë raste mund të shtrohet një pyetje… E thashë edhe më parë se këto raste tashmë kanë një ekspertizë, por nuk mund ta përjashtojmë mundësinë që palët të kërkojnë ndonjë ekspertizë të re”, ka thënë Saviq.
Ai nuk ka dashur të thotë se për cilat raste bëhet fjalë, por siç shton ai, nuk mund të thuhet se bëhet fjalë për raste që kanë të bëjnë me të njëjtin grup kriminal.
