Departamenti amerikan i Shtetit përmes një deklarate shprehu dje zhgënjim që nuk u arrit ndonjë përparim në rundin e ri të dialogut midis Kosovës dhe Serbisë për normalizimin e marrëdhënieve.
“Presim që të dyja vendet t’i marrin seriozisht obligimet e tyre me Marrëveshjen për normalizimin e marrëdhënieve, që kanë arritur më herët këtë vit. Koha po kalon. Ne duam të shohim përparim në obligimet ekzistuese dhe të mëparshme, të ndërmarra në dialog dhe me Marrëveshjen e Ohrit, duke përfshirë këtu themelimin e Asociacionit të komunave me shumicë serbe”, tha për Radio Evropën e Lirë, një zëdhënës i Departamentit amerikan të Shtetit.
“Ne do të konsultohemi brenda dhe me partnerët tanë evropianë për hapat e ardhshëm”, tha ai.
E pasi ShBA-ja u shpreh e zhgënjyer që s’ka pasur dje arritje në dialog, ka reaguar edhe aktivisti i shoqërisë civile, Rron Gjinovci, i cili ka shtruar edhe tri pyetje për amerikanët në raport me Serbinë dhe sjelljen e saj destruktive.
“A është e zhgënjyer që Serbia hala s’i ka vendosur sanksione Rusisë? Ka qenë kërkesë eksplicite e ShBA-së për Serbinë para disa muajve.
A është e zhgënjyer me Serbinë për nxitjen e serbëve me dalë nga institucione, me dhanë dorëheqje e si rrjedhojë me shkelë marrëveshjen e 2013-ës ku gjysma e saj është për integrimin e serbëve në institucione?
A është e zhgënjyer me Serbinë për dërgimin e policëve të saj në veri me qëllim rrahjen e KFOR-it me ç’rast janë gjymtuar shumë ushtarë të tij?”, janë pyetjet ka shtruar Gjinovci.
Tutje ai ka vlerësuar se koha e atyre që janë detyruar të nënshkruajnë marrëveshje të dëmshme për Kosovës ka kaluar dhe se me qasjen e tillë vetëm sa do të fuqizohet edhe më shumë kryeministri aktual Albin Kurti.
“Koha kur e keni pas Hashimin, Ramushin, Isën, Avdullahun me i ngreh për veshi e me na shti në telashet që na keni shti me këto marrëveshje skandaloze të deritashme ka kalu. Tash përballuni me realitetin e demokracisë. Vetë e keni pru te 50.2% nga 25% sa ka qenë, e nëse vazhdoni kështu keni me çu te 70%”, ka shkruar aktivisti Gjinovci.
Rundi i ri i bisedimeve për normalizimin e marrëdhënieve mes Kosovës dhe Serbisë përfundoi dje pa ndonjë pajtim mes palëve.
Nga Bashkimi Evropian thanë se kryeministri i Kosovës, Albin Kurti, nuk ka qenë i gatshëm të ecë përpara, ndryshe nga presidenti i Serbisë, Aleksandar Vuçiq, i cili “e ka pranuar propozimin e tyre” për zbatimin e Marrëveshjes bazë për normalizimin e marrëdhënieve Kosovë-Serbi.
Shefi i politikës së jashtme të BE-së, Josep Borrell, i cili bashkë me të dërguarin e BE-së për dialog, Mirosllav Lajçak, ndërmjetësuan takimin, tha se Kurti ka këmbëngulur që të formalizohet, fillimisht, njohja de facto e Kosovës nga Serbia.
Kurti dhe Vuçiq, në konferenca të ndara për media, akuzuan njëri-tjetrin për mungesën e rezultateve nga takimi.
Duke iu drejtuar gazetarëve pas takimit, kryeministri i Kosovës, Albin Kurti, tha se nuk mund të bënte kompromis me atë që ai e cilësoi si “kushtëzim të vjetër të Serbisë” për formimin e Asociacionit të komunave me shumicë serbe në Kosovë.
“Nuk ka propozim Beogradi. Ka dokument kushtëzues. Nuk mund të ketë kompromis mes propozimit dhe kushtëzimit”, tha Kurti.
Ai tha se ka qenë i vetmi në takim që ka propozuar “një udhërrëfyes të sekuencuar” për zbatimin e Marrëveshjes bazë, të arritur në Bruksel më 27 shkurt, dhe të aneksit të zbatimit të saj, të dakorduar në Ohër, më 18 mars.
“As nga pala serbe dhe as nga pala e Brukselit” nuk ka pasur kurrfarë dokumentesh si propozime, tha kryeministri i Kosovës.
Sipas tij, kushtëzimi i Serbisë është kthyer në qëndrim të emisarëve të BE-së.
“Është për të ardhur keq që emisari evropian, Lajçak, e ka pranuar një kushtëzim të tillë”, tha Kurti.
Ai tha se Lajçak e ka bërë këtë “në cenim të funksionit të tij si lehtësues dhe ndërmjetësues”.
Shtoi se është gjithmonë i gatshëm të diskutojë për Asociacionin e komunave me shumicë serbe, por se draft-statuti i tij “nuk mund të negociohet nëse, fillimisht, nuk biem dakord për udhërrëfyesin për zbatimin e Marrëveshjes”.
“Shpreh gatishmërinë time të plotë që secilin nen të Marrëveshjes bazike, secilën fjali të preambulës dhe secilën pikë të aneksit të Ohrit, jam i interesuar ta zbatojmë një orë e më parë – në plotni, pa asnjë kusht”, tha kryeministri i Kosovës.
Për zgjedhjet e parakohshme në veri të Kosovës – si mundësi për shtensionimin e situatës atje – Kurti tha se është i interesuar dhe se ato duhet të mbahen duke e respektuar Udhëzimin Administrativ, që ka nxjerrë Qeveria e tij.
“Nuk mund ta detyrosh askënd” që të japë dorëheqje, tha Kurti, duke iu referuar kryetarëve shqiptarë të komunave me shumicë serbe: Mitrovicë e Veriut, Zveçan, Zubin Potok dhe Leposaviq.
